Lev 5 | NdeIBE | STEP | “ ‘Nxa umuntu angona ngenxa yokuthi kakhulumanga ebika ngendaba ethile emphakathini ngokuphathelane lokuthile ayabe ekubonile kumbe ekuzwile, uyabe ulomlandu.

Leviticus 5

1 “ ‘Nxa umuntu angona ngenxa yokuthi kakhulumanga ebika ngendaba ethile emphakathini ngokuphathelane lokuthile ayabe ekubonile kumbe ekuzwile, uyabe ulomlandu.

2 “ ‘Loba aluba umuntu angathinta ulutho olungabe lungcolile ngokomkhuba – kungaba yizidumbu zezinyamazana zeganga ezingcolileyo kumbe ezezifuyo ezingcolileyo kumbe ezezidalwa ezingcolileyo ezihamba emhlabathini – lanxa engananzelele ngalokho, uyabe esengcolile njalo eselecala.

3 “ ‘Loba aluba engathinta ukungcola komuntu – konke okungenza ukuthi abe ngongcolileyo – lanxa engananzelele ngalokho nxa angavela akwazi uyabe eselecala.

4 “ ‘Loba aluba umuntu angafunga enganakanga kuhle ukuthi ufuna ukwenza olunye ulutho, ingabe ngoluhle kumbe ngolubi – entweni yonke umuntu angafunga ngayo butshapha – lanxa engananzelele ngalokho, angavela akwazi uzakuba lecala.

5 “ ‘Loba aluba ngubani olecala ngenxa yalezindlela, kumele aveze ukuthi wone ngandlela bani 6 njalo, njengenhlawulo yesono ayabe esenzile kumele alethe kuJehova imvana ensikazi kumbe imbuzi evela emhlambini njengomnikelo wesono, njalo umphristi uzamenzela indlela yokubuyisana ngenxa yesono sakhe.

7 “ ‘Nxa engenelisi ukuzuza imvana uzaletha amajuba amabili kumbe abantwana benkwilimba ezincane ababili kuJehova njengenhlawulo yesono sakhe – okunye kungumnikelo wesono okunye kungumnikelo wokutshiswa. 8 Uzakuletha kumphristi, ozaqala ngokunikela okomnikelo wesono. Katshile intamo yakho kodwa angatshuphuni ikhanda,

9 njalo uzachela elinye igazi lomnikelo wesono eceleni le-alithare; igazi eliseleyo kumele likhanyelwe phansi kwe-alithare. Ngumnikelo wesono. 10 Umphristi usezanikela okunye njengomnikelo wokutshiswa ngendlela eyamiswayo, umphristi aphinde amenzele indlela yokubuyisana ngesono sakhe abesethethelelwa.

11 “ ‘Nxa esehluleka ukuzuza amajuba amabili kumbe abantwana benkwilimba ababili, kalethe umnikelo wesono sakhe ingxenye yetshumi yehefa yefulawa ecolekileyo ukwenzela umnikelo wesono. Akumelanga athele amafutha kumbe afake impepha ngoba kungumnikelo wesono. 12 Kakulethe phambi komphristi ozacupha isilinganiso esigcwala isandla njengengxenye yesikhumbuzo abeseyitshisela e-alithareni phezu kweminikelo eyenziwa kuJehova ngomlilo kungumnikelo wesono. 13 Ngalokhu umphristi uzamenzela indlela yokubuyisana ngesono ingabe yisiphi ayabe esenzile, uzathethelelwa, okuseleyo kuzakuba ngokomphristi, njengalokho okwenziwa emnikelweni wamabele.

Umnikelo wecala

14 UJehova wathi kuMosi: 15 “Nxa umuntu angephula umthetho abesesona, engoni ngabomo ezintweni zonke zikaJehova ezingcwele, kalethe kuJehova njengenhlawulo inqama esuka emhlambini, engelasici njalo ebiza isiliva esizwayo ngesilinganiso seshekeli lasendlini engcwele. Ngumnikelo wecala.

16 Kumele ahlawule ngesiphambeko sakhe kulokho ayabe ehluleke ukukwenza okuphathelane lezinto ezingcwele, abesesengezelela ingxenye yokuhlanu yentengo yakho anike konke kumphristi, ozamenzela indlela yokubuyisana ngenqama njengomnikelo wecala, abesethethelelwa.

17 “Nxa umuntu angona abesesenza lokho okungavunyelwayo emlayweni kaJehova, lanxa engakwazi, uyabe elecala njalo uzakwetheswa umlandu. 18 Uzaletha kumphristi njengomnikelo wecala inqama engelasici ezavela emhlambini, njalo elesilinganiso esamukelekayo. Ngalokhu umphristi uzamenzela indlela yokubuyisana ngesiphambeko sakhe angasenzanga ngabomo, njalo uzaxolelwa. 19 Kungumnikelo wecala: ulecala lokona phambi kuka Jehova.”